Tewr dergê dinya zî tewr kilmê dinya zî Kurd o

Zanîyeno ke tewr derg û tewr kilmê dinya zî di heb Kurd ê û nê di tenî kewtî kitabê reqoran yê Guinnessî.

Sultan Kösen o Mêrdinij bi qama xo ya 2 metre û 51 santimetre tewr dergê dinya yo û Kurdêk o.

Afşin Qadirzade yo 20 serrî zî bi qama xo ya 64.7 santimetre tewr kilmê dinya yo û Kurdanê Îranî ra yo.

Goreyê kitabê Guinnessî yê reqoran rîyê erdî ser o merdimo tewr derg bi qama xo ya 2 metre û 51 santimetre Sultan Kösen o. Kösen 10ê Kanûna 1982î de Mêrdîn de emeyo dinya. Destê ey 27,5 cm lingê ey 36,5 cm ê. Sultan Kösen Mêrdîn de cuyeno.

Tewr kilmê dinya zî Kurdêk o

Ancî goreyê kitabê Guinnessî tewr kilmê dinya zî bi qama xo ya 64.7 santimetre Afşin Qadirzade yo. Afşin Qadirzade Kurdanê Îranî ra yo û dewa şaristanê Bokanî ya Xurxurî de ameyo dinya.

Afşin semedê antişê fîlmî Hewlêr de yo

Afşin Qadirzade nika semedê antişê fîlmê “Iphone 14” Herêma Federal a Kurdistanî de yo. Fîlm de aktorê sey Suleyman Rahmanî û Seba Riwar zî kay kenê.